Wetgewing en wyke
Wetgewing en wyke
Politieke wenkbroue het behoorlik gelig toe die Wes-Kaapse DA-leier, Tertuis Simmers, oor die naweek ’n video op Facebook geplaas het waar hy ’n bloedrooi Ferrari ry.
Stop by die robot! Die kar word egter slegs vir ’n veldtog vir die komende plaaslike verkiesing ingespan, kap hy by navraag ’n briek. Die verkiesing vind op Woensdag, 4 November, plaas.
Die nuuskanaal eNCA het Sondagaand in sy “We, the Nation”-program ’n spesiale bespreking gehou oor die lot van bruin gemeenskappe ná dertig jaar van demokrasie.
Hoekom maak dit saak? Deelnemers het saamgestem dat die ervaring van marginalisering by bruin mense geldig is. HEINDRICH WYNGAARD het gekyk – en meen die fokus moet na ekonomiese opheffing verskuif.
Die mense van Knoflokskraal by Grabouw is steeds omgekrap oor die minister van openbare werke, Dean Macpherson, daar wil “ingryp” om “wet en orde” te herstel.
Wat nou? Eloïse Rossouw, ’n woordvoerder vir die gemeenskap, het in ’n RSG-onderhoud alles ontken wat die minister beweer by die “Khoisan-vesting” aan die gang is.
Slegs maande nadat die PPM deur Chad Louw en Curt van Heerden gestig is, word dit nou glo deel van Mmusi Maimane se Build One South Africa-party.
Waarom is dit belangrik? Die skuif is ’n reddingsboei vir die PPM en beteken ’n moontlike groter voetspoor vir BOSA, spesifiek in die Wes-Kaap. ’n Aankondiging word môre verwag.
Die PA-leier maak nou ghai van bruin DA-lede omdat hulle “net gebruik word om die PA op sosiale media aan te val,” sê hy.
Waarom maak dit saak? Omdat geen bruin kandidaat ’n werklik prominente posisie by die DA se federale kongres kon wen nie. Die DA sê kritici en sommige kommentators weet nie waarvan hulle praat nie.
Premier Alan Winde het verlede week by die KKNK op Oudtshoorn, wat vir die 30ste jaar aangebied is, ’n rooi lig laat flikker oor oneffektiewe munisipale koalisies.
Wat sit agter sy bekommernis? Behoorlike dienslewering vir al die inwoners van die provinsie kan slegs geskied, sê hy, as stabiele regering op plaaslike vlak bestaan.
Kaapse Forum het kiesers tydens ’n paneelgesprek by die KKNK aangemoedig om partye góéd dop te hou in die aanloop tot die plaaslike verkiesings.
Hoe so? Partye wys gewoonlik presies wie hulle is deur hul optrede en besluitneming op plaaslike regeringsvlak, sê die organisasie by monde van sy uitvoerende voorsitter, Heindrich Wyngaard.
Die PA-lid Brendon (“Stamhoof”) Adams het skaars sy sit in die Wes-Kaapse Wetgewer gekry, toe bel die polisie hom omdat hy hom afgevee het aan ’n beskermingsbevel.
Wat nou? Terwyl hy voortgaan met sy werk deur onder meer sporttoerusting op Uniondale uit te deel, moet hy komende Woensdag in die Thembalethu-hof op George gaan antwoorde gee.
Die DA volg die ANC se voorbeeld uit die 2021-plaaslike verkiesing met ’n jong burgemeesterskandidaat. Chad Louw het destyds gewen, maar nie lank gehou nie.
Waarom maak dit saak? Henricus Gysman is gewild op die radio. Gewildheid alleen sal hom nie die pos verseker nie, want Oudtshoorn se politiek is onvoorspelbaar.
Die PA-leier se Facebook Live van Saterdagaand het ’n wending geneem nadat hy daarin verwys het na aantygings oor hom deur Dereleen James.
Wat is die nadraai? Me. James sê hy moenie dink dat sy nie ook sekuriteit het nie. Sy glo hy is net naar omdat sy kritiese vrae oor hom gevra het.