Snoektyd in die Kaap sorg gereeld vir mooi foto’s van hoe dit oopgevlek word, skoongemaak word, opgesny word – en die kop eenkant in ’n bak gegooi word.
Maar snoektyd beteken ook die vis word gesout en gedroog om as ’n peuselhappie geëet te word. Hierdie agt snoeke (plus ’n klompie ander op die tweede foto) is vanoggend op Caledon afgeneem.
Die stormsterk-wind wat groot dele van die Wes-Kaap vandag getref het, het die oggend vieruur se kant die 76-jarige Tobias se karavaan by sy huis op Caledon as slagoffer geëis.
Waarom maak dit saak? Tobias vertel dat hy en sy ontslape vrou, Sandra, vir maklik 45 jaar lank saam met hul kinders in die karavaan langs die Suid-Kaap vakansie gaan hou het. “Dit vat so bietjie aan die hartsnare,” sê hy.
Hierdie foto, wat vanoggend in Wellington geneem is, is aanduidend van die skade wat die reën- en stormweer van die afgelope paar dae in die Wes-Kaap aanrig.
Waarom maak dit saak? Owerhede, onder wie mnr. Mbulelo Isaac Sileku, Wes-Kaapse minister van mobiliteit, pleit gedurig by motoriste en ander padgebruikers om in dié soort weer versigtig te bestuur.
Ook ChatGPT se eienaars, OpenAI, het nou besluit: “Niks meer vir mahala nie”. Gebruikers gaan begin “betaal” vir die hulp waarvoor hulle vra.
Wat beteken dit? Advertensies gaan een van die dae langs jou “chat” met ChatGPT begin verskyn – en dit gaan beïnvloed word deur die inhoud van jou navraag aan ChatGPT.
Mense dink dalk nie altyd daaraan dat daar ook by sogenaamde spog-skole behoeftige leerders is nie. Wat egter vir die burgerregte-organisasie Kaapse Forum belangrik is, is om te kan help waar hulle kan, soos met die onlangse oorhandiging van Puma-stewels by die Hoërskool Jan van Riebeeck in Kaapstad.
Waarom maak dit saak? “Hierdie inisiatief gaan oor meer as net stewels,” sê Aldo Carelse van Kaapse Forum, wat die stewels aan die skool se nuwe sportonderwyser, mnr. Abri van Heerden, oorhandig het. “Dit gaan oor hoop.”
Die “First Friday Market”, ’n inisiatief van die vriende van die Genadendal-sendingmuseum op die oudste sendingstasie in die land, word weer hierdie Vrydag, 7 November 2025, vanaf 18:00 – 21:00 gehou.
Hoe raak jy deel daarvan? Jy is welkom om aansoek te doen om produkte of kos te kom verkoop of jy kan net bywoon en ondersteun. Maak kontak met die museum by 076 341 8527 of genadendalmuseum@gmail.com
Dit was by die opvoedkundige en historikus prof. Richard van der Ross dat mnr. Aubrey Springveldt geleer het oor die belangrikheid daarvan om te weet waar jy vandaan kom.
Wat baat dit? Mnr. Springveldt (regs), hier afgeneem saam met mnr. Danie van Wyk van die DAK Netwerk, is die naweek deur dié organisasie erken vir die navorsing waarmee hy al talle bruin mense (én Afrikaners!) gehelp het om hul stambome na te speur. Hy wag om van jou te hoor.
Die verwoesting was enorm, onthou die gemeenskapsleier Julian Hails oor die prentjie wat hom begroet het toe hy in 1969 as ’n jong volwassene saam met kollegas uit Grahamstad op Ceres aankom om te help met die herbouproses.
Wat laat hom nou daaraan dink? Dit was verlede maand 56 jaar sedert die aardbewing wat die gebied getref het. Nou betreur hy die feit dat menseverhoudings tussen rassegroepe nog self herbou moet word.
Die gebou waarin Fredericka Plaatjies haar kleuterskool in De Rust, anderkant Oudtshoorn in die Klein-Karoo, begin het, was eens ’n lykshuis. Hier gee sy nou kindertjies ’n kans op ’n beter lewe.
Wat noem sy die skooltjie? Klein Kaboutertjies. Omdat die meeste kinders tussen een en vyf jaar oud is, letter klein kaboutertjies, sê sy.
