Maandag, 1 September 2025
Mondstuk Media is opgewonde om ons eerste uitgawe aan jou bekend te stel. Dankie dat jy kom inloer het en onthou om ’n gewoonte daarvan te maak. Maandag is nou Mondstuk-dag. Ons doel is om die nuusaanbod vir Afrikaanssprekende gemeenskappe te verbreed deur stories - kort en kragtig aangebied - wat jy nie sommer elders sal vind nie; en inspirasie en insig. Ons moedig jou aan om ons voorblad af te laai en om ons op sosiale media te volg.
Hierdie hekelrubriek weerspieël die gedagtes van ’n afgetrede oom op ’n sendingstasie, wat dit geniet om die nuus dop te hou. Hy koop nog koerant, luister na die radio en kyk televisie om op hoogte te bly van wat in die wêreld aangaan. Dan dink hy na oor wat aangaan en deel sy gedagtes met ons: soms tong in die kies, soms de duiwel in, maar altyd met omgee in sy hart.
Die rede waarom Kaapse Forum met ’n bende-barometer begin het, “is om tendense in die bendegeweld in die Wes-Kaap te volg”, sê mnr. Aldo Carelse, projekkoördineer by die burgerregte-organisasie.
Hoe doen hulle dit? Mnr. Carelse antwoord dat hulle daagliks die media volg vir berigte oor bende-voorvalle. Dit word dan saamgevoeg en maandeliks ontleed.
Oorspronklik van Heidelberg (Kaap), maar nou lankal ’n Caledonner, het die man bekend as “Oom Syd” vele ysters in die vuur: eers net bestuurskool-eienaar, nou ook fotograaf, aanbieder van rugbyprogramme op Facebook en Youtube; en heeltyd bly hy op die uitkyk vir nuwe geleenthede. Hier maak hy sy kos-trok staan; daar verkoop hy vars groente, vrugte of vis.
Waarom moet jy hiervan kennis neem? ’n Mens kan sekerlik by hom leer oor die lesse en die foute wat hyself al ervaar het in die hantering van sy geldsake en die bestuur van sy besighede.
Sol Plaatje-universiteit in Kimberley se aangewese nuwe vise-kanselier en rektor, prof. Debra Meyer, neem eers in Januarie die pos permanent oor. Haar voorbereiding kom egter al tien jaar aan.
Wat maak haar aanstelling besonders? Hiermee word sy slegs die tweede bruin vrou in Suid-Afrika wat al as ’n visekanselier en rektor by ’n universiteit aangestel is.
Die VGK-dominee van Clanwilliam, wat onlangs die nuus gehaal het oor ’n uitgelekte stemnota waarin hy woedend die p-woord teenoor sy vrou geuiter het, is terug op die kansel.
Hoekom maak dit saak? In die nadraai van die opspraakwekkende stemnota, is ds. Wilden Fayzel Hector tydelik uit sy amp onthef en moes hy homself na die Wes-Kaapse Hooggeregshof wend om die mond te snoer van die plaaswerker-aktivis mnr. Billy Claassen. Ook die ring van Clanwilliam is nog in sy visier.
Die publiek het onlangs vir die eerste keer met die nuwe raadsvoorsitter van die Afrikaanse Taalmonument en -museum (ATM), me. Jacelyn Xenia Scott (néé Kok), kennis gemaak.
Waarom maak dit saak? Sover as wat bekend is, beskik sy (’n PA-lid) oor geen wesentlike ervaring of rekord van betrokkenheid in die Afrikaanse taal of -kultuurwêreld nie.
Die Sanlam-Boland Kavaliers se nommer een-haker, Sidney Tobias, sê self hy is soos goeie rooiwyn: hoe ouer, hoe beter. Gebore op 20 Maart 1989 (twee dae ná sy pa, Errol, se 39ste verjaarsdag) slaan hy nou sy eie Tobias-toks stewig in op 36.
Waarom is dit goed om te weet? Dit is nou ’n hele 40 jaar nadat Tobias snr. in die 1985-seisoen vir die Wingerdblare uitgedraf het.
’n Hele twee maande nadat pres. Cyril Ramaphosa ’n adjunkminister van die DA, mnr. Andrew Whitfield, afgedank het, het die DA nog nie ’n plaasvervanger vir hom aan die president voorgestel nie. Die rede het met die DA se “bruin dilemma” te doen: ’n skynbare tekort aan bruin kandidate, waaruit ’n aanstelling gemaak kan word. […]
