’n TikTok-sensasie, ’n verskilmaker en menings oor Gayton McKenzie, bruin jeug en oor bollemakiesie slaan in Boland-rugby...
Enlarge

’n TikTok-sensasie, ’n verskilmaker en menings oor Gayton McKenzie, bruin jeug en oor bollemakiesie slaan in Boland-rugby...

Romantha Botha praat oor haar TikTok-video's wat gereeld viral gaan; en Fredericka Plaatjies vertel hoe sy ’n lykshuis in ’n kleuterskool omskep het. Ons vra wie is Duitser Bosman, wat so geprys word deur Boland-rugby se president, Bennie van Rooi; en wat gaan Robertson Town maak as hulle Saterdag in die Gold Cup én Top 12 moet speel? Heindrich Wyngaard wonder of dit waar is dat die Here vir Gayton McKenzie tronk toe laat gaan het om die land te red; en ds. Charles Flaendorp het ’n voorstel oor hoe bruin jongmense oor hul geskiedenis geleer kan word. En julle geliefde oom Alspraat tob oor ’n oudleerder van hom, die bekkige tuinman Jôhnny.

Oom Alspraat vier sy veertig jaar se dae en nagte as ’n onderwyser, maar hy wonder oor of ou Jôhnnie die tuinman kwalifiseer as ’n produk van sy arbeid

Julle weet hopelik dat die wêreld elke jaar op 5 Oktober internasionale dag vir onderwysers vier – al was dit nou gister op ’n Sondag gehou – en julle weet natuurlik hoekom julle oom Alspraat dit nou vandag sal noem.

’n Mens wil nou nie grootkop kry nie, maar ’n mens hoef dit seker ook nie weg te steek dat party van ons (sien julle hoe knipoog ekke?) darem self veertig jaar se dae en nagte in die onderwys deurgebring het nie.

Lees die storie →

Robertson Town se sukses in die Gold Cup-kompetisie van SA Rugby veroorsaak nou vir hulle ’n Boland Top 12-kopseer. Safcol het nie simpatie daarmee nie

John Booysen, afrigter van Robertson Town, wat die naweek sy Gold Cup-kragmeting teen Worcester Villagers met 52-33 gewen het, is bekommerd oor sy diepte op slot en stut vir die komende naweek se kragmetings.

Waarom is dit ’n probleem? Town moet sy eerste Top 12-wedstryd vir die seisoen tuis teen Safcol speel en op dieselfde dag – ook tuis – ’n volgende Gold Cup-afspraak teen College Rovers uit KwaZulu-Natal nakom.

Lees die storie →

Wie die weer staan en dophou, oes nooit + ander lesse oor geld en welvaart uit die Woord en uit iemand se eerstehandse ervaring

Sommige mense kan jou stories vertel van tye toe hulle groot geld verdien het in voltydse werke en ook as eienaars van hul eie besighede. Maar dan kan hulle jou ook vertel hoe dit voel om groot geld-foute te maak, geld te verloor en in geld-moeilikheid te beland.

Waarom is dit belangrik? Omdat jy by hulle kan leer oor hoe om nie dieselfde foute te maak nie. Hier is sewe beginsels van iemand wat weet; sy is ’n regte mens, maar ons noem haar sommer Abyb Nyleve.

Lees die storie →

‘Ek is n kleurling vrou van Blomnekweg Plakkerskamp De Rust. Ek het in Maart 2025 besleit no gaan ek my skooltjie begin kom wat wil en so het ek begin met die Hulp van die Here.’

Die gebou waarin Fredericka Plaatjies haar kleuterskool in De Rust, anderkant Oudtshoorn in die Klein-Karoo, begin het, was eens ’n lykshuis. Hier gee sy nou kindertjies ’n kans op ’n beter lewe.

Wat noem sy die skooltjie? Klein Kaboutertjies. Omdat die meeste kinders tussen een en vyf jaar oud is, letter klein kaboutertjies, sê sy.

Lees die storie →

MAANDAGSOUT: Het die Here regtig vir Gayton laat tronk toe gaan sodat hy die land kan red uit die hande van misdadigers? Oem Biza sê so

Die mediapersoonlikheid en burgerlike aktivis Heindrich Wyngaard is lank reeds bekend as ’n meningsvormer oor spesifiek kwessies wat met bruin gemeenskappe te doen het, maar ook die nasionale politiek en selfs Afrikaanse letterkunde en sy gunstelingsport, rugby.

Wat kan jy hier van hom verwag? In die eerste aflewering van die “Maandagsout”-rubriek skryf hy oor ’n stelling wat die Patriotic Alliance-LP Ashley Sauls I, alias “oem Biza”, oor die partyleier, Gayton McKenzie, gemaak het. WhatsApp jou mening hieroor na 073 388 3672.

Lees die storie →

STANDPUNT: Bruin jeug gaan ten gronde weens ’n gebrek aan kennis oor hul komvandaan. ’n VGK-dominee stel ’n dringende ‘korrektief’ voor

“Hy wat die geskiedenis verwaarloos, sal dit herhaal,” is ’n aanhaling van die Amerikaanse filosoof George Santayana uit sy 1905-werk “The life of Reason”. In 1948 is dit in ’n toespraak aangepas deur die Britse premier Winston Churchill: “Those that fail to learn from history are doomed to repeat it.”

Sê wie? Dr. Charles Flaendorp, leraar van die VGK Macassar, wat in sy matriekjaar deur sy geskiedenisonderwyser aan die aanhaling bekend gestel is. Sy bekommernis oor die bruin jeug se onkunde oor hul geskiedenis, het hom nou weer daaraan laat dink.

Lees die storie →

Duitser Bosman, ‘prez. Bennie’ van Boland se hoofman, maak geld én vyande deur sy betrokkenheid by die unie se Top 12-kompetisie. Waarom is dit so?

Die maatskappy Duitser Bosman Sport (DBS) speel ’n invloedryke rol in die kommersiële bestuur en bemarking van die gesogte Top 12-uitspele in Boland-rugby se Groot Uitdaag-kompetisie. DBS se waardes is: “eerlikheid”, “spanwerk” en “kreatiwiteit”.

Wat moet ons nóg weet? Die man na wie die maatskappy vernoem is, word beide geprys (onder andere deur die unie se president, Bennie van Rooi) en gekruisig (onder andere deur klubvoorsitters). Soet én suur moet hy in dié rol verduur. Wie is hy nou eintlik?

Lees die storie →

Haar TikTok-video’s oor identiteit lok duisende views en followers. Die vraag wat sy daardeur wil beantwoord is: ‘Wie was ons voordat ons Coloured was?’

Romantha Botha, oorspronklik van George in die Suid-Kaap, is ’n joernalis wat voorheen by koerante en TV-aktualiteitsprogramme gewerk het. Nou maak sy naam as vervaardiger van dokumentêre programme, soos die huidige kykNET-reeks “Jou MASE taal” oor Afrikaans – en op TikTok kyk die wye wêreld na haar videos.

Hoe beskryf sy haarself? Meervoudig: ’n Suid-Afrikaanse swart vrou, wat kultureel as “Coloured” identifiseer. Coloured met ’n hoofletter.

Lees die storie →