Maandag, 22 September 2025
Die begin van die Madlanga-kommissie se ondersoek na bewerings van politieke inmenging in die werk van die polisie, het ook die dapper stryd van die vermoorde lt.kol. Charl Kinnear in herinnering geroep. In hierdie uitgawe praat sy vrou oor haar diepe teleurstelling dat sy moordenaars, vyf jaar ná sy dood, nog nie aan die pen gery het nie. Ons praat ook met die organiseerder van die Nasionale Khoi & San-eenheidskongres; en ons ontmoet die jong sportfotograaf Henko Nel.
Mondstuk Media het hom ná die onlangse Curriebeker-wedstryd tussen DHL WP en Sanlam Boland-Kavaliers op Facebook ontdek. Dit is waar hy, ’n graad 10-leerder aan Hoërskool Montagu, die treffendste sportfoto’s plaas.
Waarom wil ’n mens dit weet? Omdat ander jongmense by hom kan leer oor hoe om jou spaargeld te gebruik om jou passie uit te leef – en jou eerste ordentlike kamera aan te skaf.
’n Harde werklikheid: Talle bruin families bewoon huise, wetlik die eiendom van ouers of grootouers wat al jare dood is – en nie ’n boedel agtergelaat het nie.
Waarom maak dit saak? Eienaarskap kan dan nie moeiteloos aan die erfgenaam of erfgename oorgedra word nie en hulle kan dit ook nie as sekuriteit vir finansiering gebruik nie, sê Aldo Carelse, ’n projekkoördineerder by Kaapse Forum.
Past. Charlton Swigelaar, ’n bekende geestelike en gemeenskapsleier aan die Weskus, het op Facebook ’n pleidooi aan die publiek gelewer om hom te help om sy eerste boek te befonds.
Waarom dié ongewone stap? Die skryf van die boek, getiteld “The Sacred Economy”, is vir hom ’n heilige roepingsdaad, wat met die wêreld gedeel moet word.
Stephanie Pekeur het maande lank onderhoude regoor die land gevoer vir “jou MASE taal”, kykNET se nuwe reeks oor Afrikaans, waarvan die eerste episode gisteraand uitgesaai is.
Wat het dié ervaring vir haar beteken? Haar eie perspektief oor die taal, wat sy as kind op Worcester in die Boland geleer het, is hierdeur verbreed.
Die kongres wat in die foto hiernaas geadverteer word, is een van die mees ambisieuse pogings wat al ooit aangepak is: om 5 000 verteenwoordigers van die land se Khoi en San-groepe op Erfenisdag in Johannesburg byeen te bring.
Waarom sien Larry Varrie kans daarvoor? Dié jong leier glo eenheid is die fondament vir die herstel van inheemse mense se waardigheid en grondregte.
Nicolette Kinnear het haar man, topspeurder Charl, ná sy dood belowe dat sy nie gaan rus totdat almal wat ’n aandeel in die sluipmoord op hom gehad het, tot verantwoording geroep is nie.
Waarom dit nou ophaal? Dit was die afgelope Donderdag presies vyf jaar nadat sy haar “manlief” verloor het – en niemand het nog vir die daad geboet nie.
Dié oom van julle het nie ’n lekker naweek gehad nie. Die oom het nooit ’n lekker naweek wanneer hy ’n sportteleurstelling gehad het nie. Nou voordat julle dink dis dalk omdat die oom nog die Leeus ondersteun – glad nie, hoor. Die Griekwas het met rede geseëvier in Saterdag se Curriebeker-eindstryd teen die manne van Johannesburg.
