‘Lady Azelia’ lei nou die Suidoosterfees se direksie; ons onthou dat vandag die vrystellingsdatum van die slaafgemaaktes is; en die tragiese dood van ’n jong ma in die dal van genade
Enlarge

‘Lady Azelia’ lei nou die Suidoosterfees se direksie; ons onthou dat vandag die vrystellingsdatum van die slaafgemaaktes is; en die tragiese dood van ’n jong ma in die dal van genade

Ladismith is dalk meer bekend vir kaas en Karoo-lam en die skryfwerk van Abraham H. de Vries; nou ook vir Azelia Morkel se prestasies as, onder meer hoof van die TV-kanaal Via en nuwe voorsitter van die Suidoosterfees se direksie. Ons groot kwessie van die week, is die ignorering van die slawe op 1 Desember. Ons vier die Kokertoekennings van die Afrikaanse Taalraad. En ons deel ook vandag die tragiese selfdood van ’n jong ma van Genadendal oor die afgelope naweek.

Bohemia, bekroon: In haar oupa en ouma se huis in Bishop Lavis is hope Afrikaanse publikasies gelees. Hier word sy nou vir die bevordering van die taal bekroon

Dit was haar grootword-jare in oorlede ouma Poppie en oupa George Sass se huis in Bishop Lavis op die Kaapse Vlakte, wat tot nou die grootste invloed in Afrikaans op Bohemia Hoffmeester-Jumatt se lewe en loopbaan gehad het.

Waarom is dit belangrik? Me. Hoffmeester-Jumatt, vryskutjoernalis vir Rapport en Kuier-tydskrif, was Saterdagoggend een van die 2025-ontvangers van ’n Kokertoekenning van die Afrikaanse Taalraad.

Lees die storie →

Dit het 40 jaar geneem voor sy erkenning as rugbyskrywer gekry het, terwyl sy al die jare jong talent geïdentifiseer het. Dylan Maart, nuwe Stormers-vleuel, is een van hulle

Dit gons oor die indrukwekkende debuut Saterdag in Munster van die Stormers se (geleende) vleuel, Dylan Maart. Die “rugbymamma” Avril Fillies, ’n ikoniese vroue-rugbyskrywer, het saam gejuig.

Waarom? Fillies het oor die jare jong talent in die 15 man-kode, sowel as 7’s geïdentifiseer – en Dylan Maart was een van die mees onlangse spelers wat sy in 2023 hóéka by ’n sewestoernooi raakgesien het. (Die foto kom uit die argiewe.)

Lees die storie →

#LekkerEnJy vs DJ Jizzle_SA: Die Facebook-geveg oor ‘agterstevoor’-foto’s. Nou word daar prokureursbriewe geskryf

Die fotograaf wat gewildheid verwerf het met sy “Lekker en jy?”-sêding, Jason Lekota van Bonnievale, se roem pla sommige mense. Hy word nou beskuldig dat hy net foto’s van agter van vroue op Facebook plaas.

Storie agter die storie: Die beskuldigings word gemaak deur Joehan Swarts, aka “Jizzle_SA”, wie se bio hom voorstel as onder meer ’n “international DJ” en ’n “fitness junkie”.

Lees die storie →

Dié uitskieter van die Klein-Karoo, begaafd en beskeie, lei nou die Suidoosterfees se direksie. Haar voete kan nie saamdans nie, vertel sy ons, maar sy het ’n visie vir die fees

Berigte elders het klem gelê daarop dat Azelia Morkel die eerste vrou is wat as direksievoorsitter van die Suidoosterfees aangewys word. Mondstuk Media plaas die fokus op haar verstand eerder as haar vroulikheid.

Het jy geweet? Me. Morkel is die kanaalhoof by Via en het pas haar MBA-graad voltooi – en as ’n kind van die Karoo bely sy (met LOL agterna!) biltong is haar stapelvoedsel.

Lees die storie →

‘Selfmoord in die selle’: Sy het gesukkel om haar ma se dood te verwerk. Toe hang sy haarself op

Die familie van Jennifer Matthews (26) van Genadendal moes glo gereeld uit haar mond hoor hoe sy dreig om haar eie lewe te neem. Dit was veral nadat hulle ma, Josephine, sowat vier maande gelede afgesterf het.

Toe gebeur die ergste: Me. Matthews is Saterdag in die vroeë oggendure dood in ’n polisiesel gevind. Het die polisielede aan diens die opdragte van hul bevelvoerder gevolg, word nou gevra.

Lees die storie →

‘Swart Maandag’: Op 1 Desember moet almal in swart geklee wees om die wêreld bewus te maak van die Kaap se bendegeweld, het Gayton nou die dag gesê. Watter kleur het jy aan?

HEINDRICH WYNGAARD skryf oor die dag wat in Suid-Afrika meermale geassosieer word met Wêreld Vigsdag, maar dat nie genoeg mense weet dat 1 Desember ook die vrystellingsdatum van die slawe is nie, ’n rou deel van ons land se geskiedenis. Hieroor word ’n konferensie by UWK gehou vandag.

Hoekom noem Mondstuk Media dit ‘Swart Maandag’? Omdat bendegeweld, armoede en “nwata gedagtes” (verkeerde denkwyses en onkunde) ons in “slawerny” hou. Politiek en politici speel hierin ’n slegte rol.

Lees die storie →