Maandag, 20 Oktober 2025
Ons het hierdie week ons kategorieë so ’n bietjie aangepas: “Politiek en Politici” kom byvoorbeeld by omdat ons gereeld aandag gee aan die politiek en die mense wat daarin ’n rol speel. Vandag se uitgawe getuig daarvan. Die storie oor twee McKenzies, minister Gayton en raadslid Angus, het sy oorsprong by twee Facebook-plasings. Dit is ’n goeie bewys van Mondstuk se benadering: ons vat sosiale media-plasings en sit dit om in stories wat deur ervare joernalistieke hande aangepas word vir ons aanlyn-platform. Ons plaas ook intussen ons eerste kerkstorie – wat ’n ander aspek is van ons gemeenskappe waaraan ons nou meer aandag wil gee. Lekker lees, Mondstuk se lekker mense!
In die nuutste bydrae tot ons diskoers oor die bruin jeug, antwoord ds. Charles Flaendorp op die reaksie verlede week deur die opvoeder Selvin Hein op sy oorspronklike artikel.
Waaroor gaan dit? Sowel dr. Flaendorp as mnr. Hein is bekommerd oor bruin jeug se skynbare ongeërgdheid oor hul komvandaan en hul toekomsplan hiervandaan.
Die verwoesting was enorm, onthou die gemeenskapsleier Julian Hails oor die prentjie wat hom begroet het toe hy in 1969 as ’n jong volwassene saam met kollegas uit Grahamstad op Ceres aankom om te help met die herbouproses.
Wat laat hom nou daaraan dink? Dit was verlede maand 56 jaar sedert die aardbewing wat die gebied getref het. Nou betreur hy die feit dat menseverhoudings tussen rassegroepe nog self herbou moet word.
Die Apostoliese Geloof Sending van Suid-Afrika, afgekort as die AGS, het sy misnoeë uitgespreek teenoor The Evangelical Alliance of South Africa (TEASA) omdat dié sambreelliggaam glo die negende gebod oortree het.
Wat sit agter hierdie ernstige aanklag? TEASA se steun vir pogings deur die langnaamkommissie oor die regte van kulturele, geloofs- en taalgemeenskappe om die geloofsektor te laat reguleer. Hayi khona, sê die AGS hiervoor.
Dit kan seker ’n vurk in die pad genoem word. ’n Vurk in die pad word gewoonlik as ’n illustrasie gebruik vir gevalle waar jy voor twee keuses te staan kom: waar jy links of regs moet draai. Maar in dié geval gaan dit oor kant kies, oor besluit waar jy die meeste van jou menslike simpatie gaan belê, terwyl die simpatie eintlik – en dit besef jy uit die staanspoor uit, moeilik soos wat dit is om dit te aanvaar – albei partye toekom. Soos wanneer ’n kind se dood deur ’n ander kind of jongmens veroorsaak word.
Die burgerregte-organisasie Kaapse Forum het ’n aansoek by Boland-rugby ingedien om toegang te verkry tot al die klagtes oor skeidsregters, wat die afgelope twee seisoene by die unie ingedien is – en ook wat daaraan gedoen is.
Wat wil die organisasie daarmee bereik? “Ons wil sien wat die unie gedoen het oor die ernstige bewerings oor wedstrydknoeiery wat al vir so lank aankom,” sê Aldo Carelse, wat die aansoek, ingevolge die wet op die bevordering van toegang tot inligtng (PAIA), ingedien het.
Die poppe het Donderdag gedans aan die Botrivier-kant van die Houw Hoek-pas toe die nuus begin viral gaan dat die afrigter van die plaaslike rugbyspan, Herschelle van Aswegen, “met onmiddellike effek” wou bedank.
Wat gebeur toe? Mnr. Wilfred Herman, voorsitter, en die res van sy bestuurspan moes “met onmiddellike effek” krisisbestuur toepas en die afrigter sy sin gee om die situasie te red. (Maar was dit nou nodig om in die proses toe sommer vir Mondstuk Media onder die bus na Vanrhynsdorp te wil gooi?) Ons help die Botrivier-bestuur en Mondstuk se mense om “coach Hersch” beter te leer ken.
Mnr. Wilfred Solomons-Johannes is einde verlede week deur ’n arbitrasieverhoor – en ’n week voor dit ook ’n raadsbesluit – in sy pos as direkteur: gemeenskapsdienste by die Theewaterskloof-munisipaliteit herstel.
Wat is die implikasie daarvan? Dit beteken dat hy terugkeer na sy ou kantoor, maar dat hy steeds dissiplinêr verhoor moet word oor die R40 miljoen rampfondsgeld wat onder sy beheer glo wanbestuur is. O, ja, en sy TWK-rekenaar is nog by die SIU, as Mondstuk Media reg ingelig is.
Mnr. Gayton McKenzie, PA-leier, het sy regsverteenwoordiger, mnr. Eugene Botha, die afgelope week opdrag gegee om ’n van-genoot van hom in die DA, mnr. Angus McKenzie, ’n prokureursbrief te laat kry.
Waaroor gaan dit? Dis oor die DA-McKenzie ’n foto op Facebook geplaas het van die PA-McKenzie saam met ’n man wat by korrupsie betrek word. Toe plaas min. McKenzie die foto hiernaas van hom, raadslid McKenzie en ’n derde van-genoot, Ricardo, óók van die DA. Wat moet ons hierin lees?
