Maandag, 15 Desember 2025
Die helderskynende rugbyster van Kylemore, Edwill van der Merwe, se ma Chareldine praat oor hom en oor Krismis by die huis. Ons vra die RSG-man Jody Hendricks oor hoe 2025 vir hom verloop het en Keeicha McPherson van Bethelsdorp deel haar droom wat hierdie jaar bewaarheid is. Dan word stamhoof Brendon Torob Adams van die PA onder kruisondervraging deur Sumayyah Campher Petersen geneem, terwyl Keith Meyer sy misnoeë te kenne gee oor hoe die media besluit om foto’s van bekendes by stories oor familielede se skandes te gebruik. Plus: Maryna Marengo-Barnard is ’n mamma van die gemeenskap wat wenke gee oor gesonde vakansie-pret vir die kinders – al is daar nie altyd geld vir lekker dinge nie. FOLLOW ons hierdie vakansie op Facebook tot ons eerste uitgawe vir 2026 op Maandag, 19 Januarie verskyn. Seënwense!
In Bethelsdorp in die Baai het die 21-jarige Keeicha McPherson pas haar eie haarsalon geopen en haar volgelinge op TikTok daarvan vertel.
Wat maak dit besonders? Haar opgewondenheid sal jou laat dink dis iewers in ’n groot winkelsentrum, terwyl dit agter in hulle jaart is. Dit bewys dat trotsheid en inspirasie nie ’n fênsie adres vereis nie.
Hierdie tyd van die jaar is gemaak vir vrolikheid – “breaking up”-tyd vir almal in die huis gewoonlik, maar die uitdaging is om kinders besig te hou op maniere wat hulle veiligheid sal verseker.
Hoe maak mens? Die oudonderwyser, kultuurwerker en deesdae prokureur MARYNA MARENGO-BARNARD het ’n paar voorstelle.
Politieke teenstanders verdraai die PA se taal vir sensasie, sê stamhoof Brendon Torob Adams nadat die tonge geklap het oor ’n WhatsApp waarin hy verwys na “dai hone da in my wyk”.
Blaf of byt? Sumayyah Campher Petersen, op sosiale media bekend as die “Godmother van Afrikaans”, het stamhoof met ’n volle 19 vrae gepeper.
Die groot persoonlike les van 2025 was vir die RSG Sport-aanbieder en -kommentator Jody Hendricks: “Mense gaan nie vir jou doen wat jy vir hulle doen nie.”
’n Ligpunt (eksklusief met Mondstuk Media gedeel): Die familiebesigheid, wat hy in 2020 begin het, het nou gegroei tot eienaarskap van ’n Spar en Tops! in Pretoria.
Uit Kylemore, buite Stellenbosch, het hierdie jaar iets goeds gekom deur die verskyning van Edwill van der Merwe in die Springboktrui.
Wat “ma” Chareldine en “daddy” Edward sê: “Ons kan dit nou nog nie glo nie.”
Die foto’s by berigte oor ’n berugte pa en sy bekende seun (Bernie en Bryan Habana) en ’n beweerde bakleier-seun en sy bekende pa (Crispin en Franklin Sonn), het KEITH MEYER aan die dink gesit.
Hier skryf hy daaroor “uit humanitêre oorwegings”, sê hy – en nie omdat hy homself wil voordoen as ’n “hoogleraar” in Kommunikasiekunde of joernalistiek nie, wat hy nie is nie.
